ភ្នំពេញ៖ កម្ពុជានិងអូស្ត្រាលីពង្រឹងសហប្រតិបត្តិការការងារប្រយុទ្ធប្រឆាំងបទល្មើសនានា ដើម្បីធានាការពារសន្តិសុខសណ្តាប់ធ្នាប់ ខណៈកម្ពុជាធ្លាប់បានធ្វើកិច្ចសហប្រតិបត្តិការយ៉ាងល្អលើការងារប្រយុទ្ធប្រឆាំងគ្រឿងញៀន និងបទល្មើសមួយចំនួនទៀតជាមួយអូស្ត្រាលី។

ក្នុងជំនួបសំដែងការគួរសមនិងពិភាក្សាការងារលើវិស័យនៃកិច្ចសហប្រតិបត្តិការរវាងអគ្គស្នងការនៃអគ្គស្នងការដ្ឋាននគរបាលជាតិ លោក នេត សាវឿន នៅថ្ងៃទី១ ខែមីនា ឆ្នាំ២០២២ ស្នងការនគរបាលសហព័ន្ធអូស្រ្តាលី លោក Reece Philip Kershaw បានលើកឡើងថា អូស្ត្រាលីនឹងបន្តជួយកម្ពុជានៅក្នុងការផ្ទេរចំណេះដឹង និងជំនាញពីនគរបាលអូស្ត្រាលីជូនដល់នគរបាលជាតិកម្ពុជា ជាពិសេសលើការងារប្រយុទ្ធប្រឆាំងបទល្មើសបច្ចេកវិទ្យា និងបទល្មើសសម្អាតប្រាក់។

រដ្ឋមន្រ្តីក្រសួងមហាផ្ទៃ សម្ដេចក្រឡាហោម ស ខេង បង្ហាញការគាំទ្រនូវកិច្ចពិភាក្សារវាងលោក នេត សាវឿន អគ្គស្នងការនៃអគ្គស្នងការដ្ឋាននគរបាលជាតិ និងស្នងការនគរបាលសហព័ន្ធអូស្ត្រាលី អំពីការជួយជ្រោមជ្រែងការងារបណ្ដុះបណ្ដាលពាក់ព័ន្ធនឹងការផ្ទេរជំនាញនិងចំណេះដឹងពីនគរបាលអូស្ត្រាលីដល់នគរបាលកម្ពុជាក្នុងការងារប្រយុទ្ធប្រឆាំងបទល្មើសនានាដែលកំពុងកើតមានក្នុងក្របខណ្ឌតំបន់ និងសកលលោកនេះ។

ជាមួយគ្នានេះក្រឡាហោម លើកឡើងថាប្រតិបត្តិការរវាងនគរបាលប្រទេសទាំងពីរ ជាពិសេសទៅលើការអនុវត្តកិច្ចព្រមព្រៀង និងអនុស្សរណៈនានាដែលកំពុងនៅជាធរមាន បានជំរុញឱ្យភាគីទាំងពីរបន្តអនុវត្តឱ្យមានប្រសិទ្ធភាពបន្តទៀត។ លោកជំរុញឲ្យមានការពិនិត្យលទ្ធភាពចុះកិច្ចព្រម ព្រៀងស្ដីពីកិច្ចសហប្រតិបត្តិការបន្ថែមលើវិស័យទាំងឡាយណាដែលយល់ថាចាំបាច់ដើម្បីបំរើជាប្រយោជន៍ដល់នគរបាល និងប្រជាជនប្រទេសទាំងពីរ។

ស្នងការនគរបាលសហព័ន្ធអូស្ត្រាលី លើកឡើងថាក្នុងកិច្ចសហប្រតិបត្តការជាង២០ឆ្នាំមកនេះ នគរបាលកម្ពុជានិងអូស្ត្រាលី បានបន្សល់ទុកសមិទ្ធផលជាច្រើន និងបានធ្វើកិច្ចសហប្រតិបត្តិការយ៉ាងល្អលើការងារប្រយុទ្ធប្រឆាំងគ្រឿងញៀន និងបទល្មើសមួយចំនួនទៀត៕